Vonbrigði tilheyra fortíðinni.

Óttinn við vonbrigði getur lamað framtaksemi  sem verður til þess að við sleppum því að framkvæma það sem við þurfum til að öðlast það sem við þráum vegna hræðslunnar við að lenda í verri aðstæðum en við erum.  Ein stærsta breytingin sem við getum gert í lífi okkar, sem fær okkur til að taka ákvarðanir og framkvæma okkur til gagns, er það að gera okkur grein fyrir hvað það er sem við tengjum ánægju og hvað við tengjum við sársauka.  Gera okkur skýra grein fyrir að vonbrigði þurfa aðeins að tilheyra fortíðinni.

Mundu að allar hugsanir munu hafa áhrif á líf þitt.  Þó þær virðist vera lítilsverðar þá skaltu vera meðvitaður um að þær munu hafa áhrif.  Stjórn þín á hugsunum þínum mun ákvarða örlög þín, þau eru því í þínum valdi.  Eitt það mikilvægasta er að tengja vellíðan við hugsanir.  Það er t.d. þess vegna sem eiturlyf eru algeng, það er ekki vegna frábærrar markaðssetningar eða auðvelds aðgengis, það er vegna þess að þau veita vellíðan á augnabliki, allt sýnist mögulegt.  En því miður veita vímuefni falska vellíðan og verða oft orsök mikils sársauka.

Ímyndaðu þér hugann sem mp3 spilara þú getur ráðið hvort þú spilar sorgarsöngva eða söngva um hamingjuna og lífið.  Þú ræður hvernig lögum hlaðið er inn á mp3 spilarann, það sama á við hugann.  Með því að hlaða inn hugmyndum um kærleika, hamingju og velgengni muntu koma þér upp hegðunarmynstri sem tileinkar sér það sem hlaðið er inn.  Gerðu þér jafnframt grein fyrir tengingum þínum við sársauka, gerðu ekki ráð fyrir að sársauki fortíðarinnar endurtaki sig í framtíðinni.  Láttu aldrei daginn í dag gjalda leiðinda frá því í gær, nútíð og framtíð eru aldrei jöfn fortíðinni.

Hugurinn er stöðugt að verki, virkar því eins og straumur.  Það sem þú hugsar mun streyma til þín, í hugsunum felst það sem þú muntu öðlast efnislega.  Það er ekki alltaf einfalt að halda huganum jákvæðum því að fortíðin er vörðuð ýmiskonar reynslu, þess vegna koma fljótlega upp í hugann allar áhyggjufullu ástæðurnar fyrir því hvað er ekki hægt að gera;  það þarf að borga af lánunum, bílnum osfv..

Hugsaðu þér því lífið sem bát sem er á siglingu, í kjölfarinu er straumur sem fjarlægist fyrir aftan bátinn.  Það sem fær bátinn til að sigla áfram er vélaraflið sem beitt er í augnablikinu.  Straumurinn í kjölfarinu getur ekki siglt bátnum áfram hann er aðeins sjónhverfing þeirrar orku sem þegar hefur verið nýtt og ef þú ákvarðar stefnu bátsins eftir kjölfarinu er eins víst að hann muni steyta á skeri.  Reynsla þín og það sem þér hefur verið sagt til þessa dags er fyrir aftan þig í straumi kjölfarsins og ef þú notar það til að koma í veg fyrir að þú öðlist það líf sem þú þráir, lifirðu vonbrigði gærdagsins.

Það er ekki til neins að hafa áhyggur af því sem þú hefur ekki stjórn á; vegna þess að það er ekkert sem þú getur gert í málinu.  Svo til hvers að láta áhyggurnar ráða för, þegar þær koma í veg fyrir að þú lifir drauminn. -Wayne Dyer.