Við komumst eins langt og trúin.

Haltu þig ætíð við markmið þitt ekki gefast upp, settu daglega framtak í draum þinn.  Það sem kemur í veg fyrir að draumar rætast er þegar þeir eru lagðir til hliðar vegna skorts á úthaldi.  Með öðrum orðum skortur á staðfastri trú.

Þegar við erum í kapphlaupi og markið er í sjónmáli, er álagið á hjarta, taugar og vöðva í hámarki.  Markmið hugans verður að vera skýrt þegar aðeins lokaátakið er eftir.  Þeir hlauparar eru aumkunarverðir, sem hlaupa vel, fullir af kjarki og dug, þar til markið er í sjónmáli en leyfa þá veikleika eða sérhlífni að ná á sér tökum.  Þeir munu aldrei vita, hve nærri markinu þeir voru, hver sigurtilfinningin er.

Biðjum því um trú, eins og þyrstur maður biður um vatn í eyðimörkinni.  Gerðu þér grein fyrir hvað það er mikils vert að eiga fullvissuna um að trúin mun aldrei bregðast.  Vertu eins öruggur í trúnni og með andardráttinn.  Efldu trúna með daglegri bæn og hugleiðslu á meðvitaðan hátt.  Þig mun ekki vanhaga um neitt, vegna þess að þú hefur allt sem þarf.  Okkur brestur oftast í versta falli, trú til að vera viss um að við búum við allsnægtir.  Því erum við svo oft eins og ríksmanns börn, sem sitjum tötrum vafin innan um alla þá hluti sem hugurinn girnist án þess að geta notið þeirra.

Hafðu því  markmiðið hvað þú ætlar að verða frekar en hvað þú ætlar að hafa.  Sjáðu þig fyrir þér sem þá persónu sem þú vilt verða í þeirri stöðu sem þig dreymir.  Þú munt alltaf vilja meira en bara efnisleg gæði þau uppfylla aldrei drauminn ein og sér.  Sjáðu þig fyrir sem betri persónu þá persónu sem þú vilt verða þar sem þú getur gert það besta fyrir fjölskyldu, vini og samferðamenn.  Lífið er vegferð, njóttu hennar og gerðu það sem þú best getur.

Jesú sagði  Matt. 21.22  Allt sem þér biðjið í bæn yðar, munuð þér öðlast, ef þér trúið. 

Don't tell God how big your storm is....tell your storm how big your God is. - Unknown